Su säht mer en Kölle

Allersiele - November - Namensdaach - Der 11. em 11.

Unsere Kölsch-Lektion gibt es jede Woche neu im Express - Die Woche - Und jetzt auch online.

Allersiele
Am 1. November feere mer der Jedenkdaach Allerhellije un am 2. November Allersiele. Mer denk aan all die leeve verstorvene Verwandte un Fründe. Dä Daach ess bei uns huh jeaach. Allt Woche vörherr wäden de Jräver schön parat jemaat. Dä janze Kirchhoff (Friedhof) ess met Lämpcher, en denne Kääzjer brenne, üvversäht. Aan de Kääzjer süht mer dann och, wä allt am Jrav wor. Ov wäden de Jräver nor för de Verwandtschaff erussjeputz. Nor dat et Lückcher jitt, die och et Johr üvver die leeve Dude besöke, öm met denne dann stell un allein ne kleine Verzäll ze halde.

November
De Däch wäden kööter un et blös e schubbich Lüffje. Der Sommer säht Adschüss un de Bäum leuchte en de herrlichste Färve. En beste Zick, de Siel baumele ze loße, bevör dä Chressdachsstress loss jeit. Ävver am 1. November fängk och der Dudemond aan: All die Dudefeste die mer dann hann! Dann muss mer fies oppasse, dat mer nit et ärme Deer kritt (schwermütig wird). En keinem Mond weed esuvill jestorve wie im November.
Ävver blos nit do draan denke. Mer määt et sich doheim jemötlich. E Aromakääzje weed aanjestoche, en schön CD opjelaat, e lecker Teeche dobei un mer fängk aan ze dräume…

Der 11. em 11.
Dis Johr fällt der 11.11. op ene Sambsdaach. Die eine freuen sich, die andere nit. En nem Bläck- Fööss-Leed heiß et: „Am 11.11. jeit et widder loss:/ Schirve, Splitter, Schläjereie, stinkbesoffene Pänz./ Uns Altstadt ess en Müllkipp, do kritt mer doch de Krämp…“ Vun üvverall kummen se dann öm för Party (dat ess Neukölsch) ze maache un mänche och, öm för su richtich de Sau eruss ze loße. Wo ka’mer dat söns esu wie en Kölle? „Kölle, Partystadt Nr. 1!“. De Jeister die mer reefe erschlagen uns jetz. „Ov krüzz odder quer,/ ov Knääch odder Här,/ mer loße nit, mer loße nit vum Fasteleer…“ Un et Motto dis Johr: „Wat e Thiater, wat e Jeckespill…“.

Namensdaach
Fröher em hellije Kölle un och noch en minger Famillich woodt immer der Namensdaach jefeet. Hück hät dä Jebootsdaach dem Namensdaach der Rang avjelaufe. Un wat ha’mer nit all för Namensdäch em November: Johannes, Martin, Gertrud, Margareta, Konrad, Elisabeth, Katharina… Öm nor e paar ze nenne. Ich hann am 25. November op Katharina Namensdaach. Die Weechter die op Katharina jedäuf woode sin heißen dann: Karin, Kati, Kätche, Käte, Katja, Katrin, Ina, Inche, Tring, Tringche odder och Trina. Do kritt mer doch Woot, wa’mer su ne schöne Name hät un weed dann Trina jerofe. Trina säht mer en Kölle och för ne boore Trampel odder söns en Trööt. 

Schon gelesen?